BASQUE RESEARCH
 Euskal ikerketa, garapena eta berrikuntzaren webgunea

Berriak

Kontaktua:

Prentsa Bulegoa

UPV/EHU

Harremanetarako datuak:

komunikazioa@ehu.es

(+34) 946012065

2010/9/2

Nola handitu eraikinen energia-eraginkortasuna

UPV/EHUko Eraikuntzaren Energetika (ENEDI) ikerketa-taldea —Makina eta Motor Termikoak, Fisika Aplikatua eta Arkitektura sailei atxikita dago— aditu moduan ari da parte hartzen eraikinetan energia-kontsumoa murriztea helburu duen Europako ILETE (Initiative for Low Energy Formation in Europe) programan. Egun, Europar Batasuneko energia-kontsumoaren % 40 eraikuntzaren sektoreak eragiten du.

Orotara, Europako bederatzi unibertsitate ari dira aditu moduan parte hartzen proiektuan. UPV/EHU da, plataforman, Espainiako unibertsitate bakarra da. Gainerako unibertsitate-ikastegi guztiak Frantziakoak, Alemaniakoak, Italiakoak, Errumaniakoak, Austriakoak eta Poloniakoak dira.

Plataformako kide bakoitzak trebakuntza-, dibulgazio- eta kontzientziazio-mintegiak antolatu eta eskaintzen ditu, energiaren ikuspegitik eraginkorragoak diren eraikinak eraiki eta hirigintza-proiektu iraunkorragoak gara daitezen.

Haren estrategia globalari dagokionez, eraikuntzarekin harremana duten taldeei (ingeniariei eta arkitektoei) informazioa helaraztea eta kontzientzia harraraztea da ILETE proiektuaren helburua. Era berean, energia-kontsumo txikiko lanak egiaztatu eta garatu nahi ditu, eta, epe ertainera, lan horiek eskala handian gauzatzeko konpromiso politikoa lortu nahi du.

Martxan jarritako ekintzen bidez, eraikinetako energia-kontsumoa oraingo kontsumoaren % 20 izatea lortzea da ILETE proiektuaren epe luzeko helburua.

Eraikinaren estalkiarekin harremana duten ezaugarriak, hala nola isolamenduen lodiera, orientazioa, beiraz hornitutako azalera edo zuraren kalitatea, energia-kontsumoari zuzenean eragiten dioten faktoreak dira. Ezaugarri horien eta eguzki-energia, energia termikoa, fotovoltaikoa, geotermikoa, eta, oro har, energia berriztagarriak erabiltzeko aukerekin lotutako ezaugarrien berri eman dute ILETE proiektuan egindako mintegietan.