#GaiNagusiak

Zientzia eta teknologiako gaiek ez dute garrantzi apartekorik telebistako albistegietan

Noiz argitaratua: 10/06/22 | Kategoria: Ikerketa | Gaiak: #Orokorrak #Gizarte-zientziak #Teknologia
 Itziar Nogeras, Elhuyar Fundazioko zuzendari nagusia, Andoni Eizagirre, azterketaren egilea, eta Fernando Cossío, Ikerbasqueko lehendakaria

Elhuyar Fundazioak egindako ikerketa baten arabera, zientzia eta teknologiako gaiek ez dute aparteko garrantzirik eta lehentasunik telebistako albistegietan. Hori da Andoni Eizagirrek egindako Zientzia eta teknologia hizpide: telebistako albistegiak ikerketaren ondorio nagusia. Elhuyar Fundazioak, Eusko Jaurlaritzaren Hezkuntza Sailaren babesarekin, zientzia eta teknologia gaiak telebistako albistegietan nola ematen diren aztertu du, sei hilabetez. ETB1, ETB2, TVE eta La2 kateek ematen dituzten gaueko albistegiak izan ditu aztergai Elhuyarrek. Zientzia eta teknologia aipagai izan dituzten 69 albistegi aztertu ditu, zoriz aukeratutako egunetan emanak guztiak ere. Telebistako albistegietan zientziak eta teknologiak duten tratamendua aztertzea izan du helburu ikerketak.

Azterketan ateratako ondorio nagusietako bat da albistegietan ez dutela aparteko garrantzirik eta lehentasunik, eta bestelako gaiak hobesten direla. Albistearen adierazgarritasun-maila zehazteko, agerpena eta kokapena, albistearen iraupena, eta soinuari eta irudiari emaniko garrantzia aztertu dira. Zientzia-albisteen % 4 bakarrik agertu dira goiburuan, eta, sarrerako titularretan, orotara, % 25. Aztertutako albisteetatik, % 58 iraupen luzekoak izan dira; % 16, iraupen ertainekoak, eta % 26, laburrak.

Gaiari dagokionez, lau multzotan banatu dira albisteak: “Zientzia eta teknologia”, “Zientziaren eraginak”, ”Zientzia-politikak” eta “Zientzia-sistema”. “Zientziaren eraginak” multzoko albisteak izan dira ugarienak (% 58), zientziak eta teknologiak gizartean duten eraginari buruzkoak alegia.

Albisteen jatorriari dagokionez, beste iturri batzuetatik jasoak izaten dira batik bat: telebista-kateek ez dute zientzia eta teknologiari buruzko albisteak jorratzeko ohiturarik. Generoari dagokionez, berriz, urriak dira erreportajeak edota kronikak, aurrez grabatuak izaten dira berriak, eta estilorik ohikoena informatiboa da. Pertsonaien inguruko analisian, gertakariari buruzko hainbat ikuspegi biltzen dituzten albisteak urriak izaten dira, baina autoritatearen jatorria —oro har— aniztuna da, eta haren posizioa bat etorri ohi da albistearen trataerarekin. Azkenik, telebista-katearen arabera, bertako gertakariei arreta desberdindua ipini ohi zaiela ondorioztatu da: ETB1 eta ETB2 dira euskal lurraldeari arreta ipintzen diotenak. Telebista-kate horietan, jatorria Euskal Herrian duten albisteak nagusitzen dira.

Informazio osagarria

  • Itziar Nogeras, Elhuyar Fundazioko zuzendari nagusia, Andoni Eizagirre, azterketaren egilea, eta Fernando Cossío, Ikerbasqueko lehendakaria, Elhuyar Fundazioa
  • icono_documento
    Prentsa-oharra, gaztelania, Elhuyar Fundazioa
  • icono_documento
    Prentsa-oharra, euskara, Elhuyar Fundazioa
Basque Research

Egilea: Basque Research (Elhuyar Fundazioa)

Laguntzailea: