#GaiNagusiak

Kafe torrefaktuak propietate antioxidatzaile gehiago ditu, Nafarroako Unibertsitateko tesi baten arabera

Noiz argitaratua: 08/03/06 | Kategoria: Ikerketa | Gaiak: #Osasuna
 Isabel López Galilea

Kafe torrefaktuak propietate antioxidatzaile gehiago ditu modu naturalean txigortutakoak baino, Isabel López Galilea Nafarroako Unibertsitateko biologoaren arabera. Ikerketaren egileak dioenez, torrefaktuaren txigorketa-prozesuan gehitzen den azukreak gaitasun antioxidatzaile handiko konposatuak sorrarazten ditu.

Elikagaien Zientzia, Fisiologia eta Toxikologia Saileko ikertzaileak merkaturatzen diren hamaika kafe-mota aztertu ditu tesian. Tesiaren izenburua hau da: “Influencia del tueste torrefacto sobre los principales componentes del café y su capacidad antioxidante y pro-oxidante” (Kafearen osagai nagusietan txigorketa torrefaktuak duen eragina eta haren gaitasun antioxidatzailea eta prooxidatzailea).

Zientzia Fakultateko ikertzaileak dioenez, hainbat ikerketak edari horren onurak erakutsi dituzte. Besteak beste, dietan antioxidatzaile gehien ematen duen elikagaietako bat dela uste dute. Antioxidatzaileek erradikal askeen aurrean babestu egiten gaituzte, eta, hain zuzen ere, zahartzearen eta hainbat gaixotasunen eragile dira erradikal askeak. Kafeak, beste edari batzuekin alderatuta, ardoarekin edo tearekin alderatuta esaterako, haiek baino hamar aldiz gaitasun antioxidatzaile handiagoa du.

Antioxidatzaile-gaitasuna, prestatzeko moduaren araberakoa

Ikerketa egiteko, nafarrek kafea kontsumitzeko zer ohitura dituzten aztertu du Isabel López-ek, 300 inkestaren bidez. Emaitzen arabera, nafarrek egunean batez beste 125 ml kafe hartzen dute, nahiz eta kantitate hori zertxobait handiagoa den emakumezkoen kasuan. Halaber, gehienbat ehotako kafea kontsumitzen dute, txigorketa naturalaren eta torrefaktuaren arteko nahastea duena, eta, gehienetan, kafe-makina italiarra edo moka erabiltzen dute, iragazkia duena, espresa edo enboloduna baino gehiago.

Behin ehotako kafe torrefaktuak gaitasun antioxidatzaile handiagoa duela ikusita, osagai horiek edarian nola aurkezten diren aztertu du, hura baita kafea kontsumitzeko ohiko modua. Kafea egiteko modu desberdinen artean ikusi du espresaren bidez egindako kafeak gaitasun antioxidatzaile handiagoa duela, kafe-makina italiarrean, enbolodunean edo iragazkidunean egindakoak baino. Uste duenez, ezaugarri horiek txigorketa-prozesuan sortzen diren osagai nabarrei zor zaizkie, osagai polifenolikoei eta kafeinari.

Horrez gainera, ikertzaileak frogatu du kafearen osagaiak, usaina esaterako, aldatu egiten direla txigorketaren eta egiteko moduaren arabera eta, horregatik, uste du haien portaera banaka aztertu behar dela. Ikerketan, kafearen 34 usain-osagai identifikatu ditu eta, horien artean, zenbait berri ere identifikatu ditu, oktanola adibidez, laranja-usain intentsua ematen duena.

Informazio osagarria

  • Isabel López Galilea, Universidad de Navarra
Laura Juampérez

Egilea: Laura Juampérez (Universidad de Navarra)

Laguntzailea: