#GaiNagusiak

Melanomaren, azaleko minbizi oldarkorrenaren, diagnostikoa eta pronostikoa egiteko metodo bat patentatu dute

Noiz argitaratua: 14/02/19 | Kategoria: Ikerketa | Gaiak: #Orokorrak #Biziaren zientziak #Osasuna #Teknologia
 Giza melanozitoen kultura primarioak

UPV/EHUko ikertzaile batzuek azaleko melanomaren, heriotza-tasa handiena duen azaleko minbizi-motaren, diagnostikoa eta pronostikoa egiteko metodo bat garatu dute. Metodo horri esker, batetik, minbizi-mota horren detekzio goiztiarra modu eraginkorragoan egin ahal izango da, eta, bestetik, tratamendu pertsonalizatuagoak garatu ahal izango dira.

Melanoma tumore gaizto bat da, melanozitoak eraldatzean sortzen dena. Eguzki-erradiazioaren eragin kaltegarrietatik babesten gaituen melanina sintetizatzeaz arduratzen dira melanozito horiek. Azaleko minbizien artean hirugarren ohikoena da melanoma, baina heriotza-tasa handiena du, neurri handi batean potentzial metastatiko handia duelako.

Hori dela eta, “diagnostiko goiztiarra da pazienteak salbatzeko oraingoz dugun tresnarik onena. Hain zuzen ere, fase goiztiarreko melanoma bat duten pazienteek % 95eko biziraupen-tasa izaten dute; metastasia duten pazienteetan, berriz, 5 urtera duten biziraupena % 50eraino jaisten da”, azaldu du Yoana Arroyok, ikerketa egin duen UPV/EHUko Zelulen Biologia eta Histologia Saileko ikertzaileak.

Zelulen Biologia eta Histologia Saileko Tumore Markatzaileak eta Terapia Berriak ikerketa-taldeak hiru urte daramatza azaleko melanoma aztertzen. Taldearen lanaren helburua da melanoma gaiztoaren diagnostikoa eta/edo pronostikoa egiteko balia daitezkeen markatzaileak edota harekiko sentikortasunaren ardura dutenak identifikatzea. “Melanoma-zeluletan espresioa aldatuta zuten —melanozito arruntekin alderatuta— proteinak bilatzen hasi ginen, eta, emaitza horretatik abiatuz, dagokien geneetan aztertzen ari gara, espresioa, mutazioak eta epigenetika ikertzen”, zehaztu du Arroyok.

Emaitzek berretsi zuten melanoma-zelulek espresio geniko eta proteiko bereizgarriak dituztela, eta horiek aukera ematen dutela, batetik, tumore izango den edo ez bereizteko, eta, bestetik, tumore den kasuetan, gaitasun inbaditzailea —eta, beraz, metastasia eragiteko probabilitate handiagoa— duten zelulak desberdintzeko. Hala, bada, ikertzaileek molekula-biomarkatzaile berriak identifikatu dituzte, melanomaren diagnostikoan, pronostikoan eta harekiko sentikortasunean intereseko izan daitezkeenak.

Tratamendu pertsonalizatuagoen bila

Une honetan, UPV/EHUko ikertzaileak gene hautagaiak baliozkotzeko fasean ari dira lanean; horretarako, geneen espresio-mailaren analisia egiten dute melanomen eta nevien (gaiztoak ez diren melanozitoen ugaltzea) biopsietan. Gurutzeta eta Basurtuko unibertsitate-ospitaleetan diagnostikatutako pazienteen biopsiak jasotzen dituzte. Helburua da “molekula-markatzaileen konbinazio bat aurkitzea aukera emango diguna melanomaren diagnostikoa eta pronostikoa modurik eraginkorrenean egiteko”.

”Diagnostikatzeko metodo hori dela eta, metastasiak garatzeko probabilitate handiena duten pazienteak identifika daitezke, eta, hala, haien tratamendua eta biziraupena hobetzeko aukera izan. Gainera, ikerketa honek bidea ireki diezaieke tratamendu pertsonalizatuagoak garatzeko ikerketa-lerro berriei”, azaldu du Arroyok.

 

  • Oharrak:

    María Dolores Boyano doktoreak zuzentzen duen ikerketa-taldea diziplina anitzetako eta hainbat zentrotako ikertzaileez osatua dago. Talde horretako kideak dira UPV/EHUko Zelulen Biologia eta Histologia Saileko irakasle batzuk, zeinak oinarrizko ikerketan eta ikerketa traslazionalean baitihardute, eta UPV/EHUko Dermatologia, Oftalmologia eta Otorrinolaringologia Saileko irakasle batzuk, zeinek Gurutzetako eta Basurtuko unibertsitate-ospitaleetan lan egiten baitute. Taldea 1994an osatu zen, giza melanoma eta azaleko beste tumore batzuk ikertzeko zuten interesa zela eta, eta gaur egun tumore hematologikoetara zabaldu du eremua. Ikerketa-taldea ondo bereizitako hiru ikerketa-lerro ari da garatzen oinarrizko onkologia traslazionalaren arloan; besteak beste, markatzaile diagnostiko eta pronostikoen azterketa, melanoma duten pazienteen serumaren laginetatik eta biopsietatik abiatuta. Ikerketa hori dela eta, patente bat, P10196ES00 erreferentziakoa, aurkeztu da Espainiako patente- eta marka-

  • Interneteko helbidea:

    www.ehu.es

Informazio osagarria

  • icono_documento
    Prentsa-oharra, gazteleraz, UPV/EHU
  • icono_documento
    Prentsa-oharra, euskaraz, UPV/EHU
  • Giza melanozitoen kultura primarioak, UPV/EHU
  • Yoana Arroyo-Berdugo, Eusko Jaurlaritzaren unibertsitate-sistemako “Tumore Markatzaileak eta Terapia Berriak” taldeko ikertzailea, UPV/EHUko Medikuntza eta Odontologia Fakultateko Zelulen Biologia eta Histologia Sailean
Komunikazio Bulegoa

Egilea: Komunikazio Bulegoa (UPV/EHU)

Laguntzailea: